Cognados e topónimos relacionados

En Galicia cóntanse outros sete lugares chamados (O) Aciveiro, o plural Aciveiros (Cedrón, Láncara, Co),  Coto Aciveiro (Forcarei, Po) e O Monte do Aciveiro (Armentón, Arteixo, Co)

Da mesma familia léxica temos en Galicia O Acevo, O Acevro, O Acivo, (O) Acivro, Os Acivros, O Acevedo, (A) Aceveda, Acevido, Acivedo, (O) Acivido, O Aciviñeiro e Acevoso, xunto cos compostos nos nomes das parroquias de Acevedo do Río (Celanova, Ou) e Santiago do Acevo (Ribeira de Piquín, Lu).

Tamén en Portugal hai Azevo (freguesía e lugar de Pinhel), Azevedo, Azevido, Azeveda, Azevedos, Azevinhos, Aziveiro (Telhado, Vila Nova de Famalicão) e o río Azibo.

No resto da Península encontramos (El) Acebo, Acebedo, La Acebeda, Acebal, El Acebrón, Acebes del Páramo, La Acebosa, Aciberos.

(A) Acivreira (Cumbraos, Sobrado, Co e Corvelle, Vilalba, Lu), Os Acivreiros (Irixoa, Muras, Lu) e Acebreiras en León, seguramente proveña do mesmo tema, malia a súa proximidade formal con O Cebreiro, en que non podemos precisar se se trata dun fitotopónimo ou dun zootopónimo proveniente do lat.*ecifĕru, lat. cl. ĕquĭfĕrus 'cabalo salvaxe'.