Sobre nosotros
Toponomasticon Hispaniae. Prolongación antroponímica y proyección americana (ToponHisp-PA)
Este prochecto tien como obchectivo lo estudio y divulgación d'un corpus triau de nombres de puesto de tot lo territorio espanyol y portugués, con as mesmas bases metodolochicas y considerando totas las luengas peninsulars. Ye composau per tres equipos que reúnen mas de 60 investigadors de distintas universidaz europeas y americanas. Lo estudio de cadaún d'os nombres de puesto se presienta en una ficha toponimica, con información cheografica, etnografica, historica, cartografica y lingüistica; esta zaguera incluye etimolochía, forma fonica, motivación, clasificación semantica, cognatos y falsos cognatos. Tamién s'ofreix información d'os chentilicios y pseudogchentilicios de cada toponimo, y d'os apellius y nombres personals que ha chenerau, con a suya plasmación cheografica en un mapa. Cada ficha toponimica ye vinculada con una ficha etimolochica, en a cual se condensa la evolución de cada etimo con os resultaus en os diversos territorios. En as dos fichas se disposarán vinclos hipertextuals que posibilitan busquedas en multiples direccions, no nomás entre los toponimos relacionaus, sino tamién con a bibliografía citada y las fuents documentals.
Asinas, en o Toponomasticon Hispaniae. Prolongación antroponímica y prochección americana, continación d'o Toponomasticon Hispaniae (2021-2025, se veiga l'historico), se presienta la información mas relevant de cada nombre, a la disposición d'os especialistas y d'o publico en cheneral. Tenemos present que los toponimos fan part d'a vida d'as personas y integran una part important d'o suyo patrimonio cultural. En ixe sentiu, miramos de contribuyir a la transferencia d'a suya conoixencia enta la sociedat; y, tamién, a expandir la conoixencia social d'as distintas variedaz lingüisticas y lo respeto a las suyas especificidaz, entendidas como una riqueza cultural colectiva.
