Sobre nós
Toponomasticon Hispaniae. Prolongación antroponímica y proyección americana (ToponHisp-PA)
Esti proyectu tien como oxetivu l’estudiu y la divulgación d’un corpus escoyíu de nomes de llugar de tol territoriu español y portugués, coles mesmes bases metodolóxiques ya considerando toles llingües peninsulares. Ta formáu por tres equipos qu’axunten más de 60 investigadores d’estremaes universidaes europees y americanes. L’estudiu de caún de los nomes de llugar preséntase nuna ficha toponímica, con información xeográfica, etnográfica, histórica, cartográfica ya llingüística; esta cabera inclúi etimoloxía, forma fónica, motivación, clasificación semántica, cognaos y falsos cognaos. Úfrese tamién información de los xentilicios y pseudoxentilicios de cada topónimu, y de los apellíos y nomes personales que xeneró, col so reflexu xeográficu nun mapa. Cada ficha toponímica ta venceyada a una ficha etimolóxica, na que se condensa la evolución de cada étimu colos resultaos pelos diversos territorios. En dambes fiches van disponese enllaces hipertestuales que posibiliten búsquedes en múltiples direcciones, non namás ente los topónimos rellacionaos, sinón asina mesmo cola bibliografía citada y les fontes documentales.
D’esta miente, nel Toponomasticon Hispaniae. Prolongación antroponímica y proyección americana, continuación del Toponomasticon Hispaniae (2021-2025, véase l’históricu), amuésase la información más relevante de cada nome, a disposición de los especialistes y del públicu en xeneral. Tenemos presente que los topónimos formen parte de la vida de les persones ya integren una parte importante del so patrimoniu cultural. Nesti sen, pretendemos contribuyir a la tresferencia del so conocimientu a la sociedá; y, tamién, a esparder el conocimientu social de les estremaes variedaes llingüístiques y el respetu a les sos especificidaes, entendíes como una ayalga cultural colectiva.
