A partir d'una nominalización del llat. altu ax. 'altu' (o bien directamente dende'l llat. altu s.n. ‘llugar eleváu’ [dende Cicerón, OLD 110]) formáronse derivaos estremaos, ente los que destaquen, pola so xaceda toponímica, los apellativos altare (Ernout/Meillet 24) y altariu (REW 381.2), esti últimu, paez ser que namás foi propiu del llatín peninsular (PidalOrígenes 99-100). Dende'l primeru continuóse una espresión outar > otar s.m. que güei nun se conserva, pero que debió tener della vitalidá na dómina medieval, según s'entiende de documentaciones como uase a prono per la vila a la carrera autar de lobos s.f. [SPM/518] (DELLA 5, 58) o pol so remanecimientu en topónimos como Outardexú (‘l'otar d'abaxo’) (GarcíaToponAst 40). Dende altariu, siguióse la voz oteru (< outeiru) s.m. ‘Elevación [del terrenu].’ (DALLA), que s'afaya na base d'un númberu abondante de topónimos asturianos (GarcíaAriasToponAst 40). Nel casu del topónimu Outur, la rellación con altu paez evidente, sobre manera pola evolución regular qu'amuesa'l raigañu alt-, con velarización y vocalización de la líquida implosiva en [u̯] y formación d'un diptongu decreciente cola vocal precedente (au > ou) que, nel casu del asturianu occidental (onde queda encartiyáu'l topónimu), consérvase.

Más problemes d'interpretación presenta, pela contra, la vocal tónica. Asina, García Arias suxer que, na base d'esti topónimu, puea alcontrase un apellativu heriede de dalguna mena de deriváu d'altu (GarcíaToponAst 41), quiciabes el conocíu altare pero con influxu o encruz con otru términu que xustifique la vocal velar tónica, posiblemente *altura, d'au hebo siguise altura, que pudo dexar buelga nun topónimu como Otura (cf. DELLA 1, 391) (véase infra, na documentación medieval, el rexistru Oture).

De toles maneres, tampoco nun se pue refugar que, baxo la espresión d'esti topónimu tea la construcción determináu + determinante, col envís d'espresar la posesión, col seguidor d'altu + nome d'un posesor en xenitivu. El posesor podría ser Urrius (SolinCognomina 195), con confusión de la vibrante múltiple cola simple, o quiciabes otros como Urgius (SolinCognomina 195), o incluso Aureus, en rellación con otru topónimu asturianu, L’Uturi (Trubia), estudiáu por SuárezOnomTrubia 247. El rexistru medieval Oture tamién podría avalar esta hipótesis, si bien el restu de documentaciones, neto que la espresión moderna, confirmaríen la perda xeneral de la vocal palatal final del xenitivu.