El topónimu estudiáu ta rellacionáu con lauru s.f. ‘árbol del xéneru Laurus nobilis’ (REW 4943, Ernout/Meillet 346), que xeneró una riestra de continuadores románicos (DÉRom-1 s.v. */’laur-u/), ente ellos l'ast. (a)lloru s.m. «árbol del xéneru Laurus nobilis» (DALLA; DELLA 1,364), con posible a- protética por aglutinamientu de la vocal del artículu determinativu (cf. tamién l'italianu alloro DELI 86). Pa la xénesis del topónimu Llorío, GarcíaToponAst 374-376 tien plantegao dos probables víes de formación:

Per una banda, la fixación del nome de llugar podría xustificase a partir del apellativu asturianu lloréu s.m. «Laurus nobilis, árbol [de fueya non cayedizo de color verde escuro y arumoso, que da flores blanques y pequeñes]» (DALLA), deriváu de lloru col siguidor del sufixu abondancial -etu, sufixu que yá yera frecuente en llatín pa la creación de fitónimos (vid. lauretum, OLD 1010). Ta documentáu como lexema de magar el s. XVIII, y con función toponímica [Laureto] dende l'añu 1042 (DELLA 4,479). Teniendo en cuenta la documentación histórica del topónimu equí analizáu (ver infra “Lorio” a.1192), esta propuesta llevaría a pensar na perda (y, poro, na non representación gráfica), yá nel sieglu XII, de la oclusiva intervocálica tres del consiguiente procesu de lenición (-t- > -d- > - ð- > Ø), asina como nel zarru de la vocal tónica [é] > [í], quiciabes por una antigua metafonía, anque ensin descartar tampoco una confusión col heriede del sufixu -itu. Nesti sen, ha reparase na productividá, na toponimia gallega, de dobletes del tipu Louredo / Lourido (MoralejoToponGallega 308-309).

Sobre'l desaniciu de -t-, enforma sistemáticu nel conxuntu del asturianu cuando se trata de los sufixos -atu, -etu y -itu, véase GHLA 161.

Per otra banda, nun habría refugase que la fixación del topónimu Llorío respuenda a un apellativu asturianu non documentáu, del tipu *llori(y)u, que sedría'l resultáu de derivar l'ast. lloru s.m col siguidor del sufixu diminutivu -īculu (GarcíaAriasEstudios 97), teniendo en cuenta que -c’l- resulta en [y] en tol asturianu centro-oriental y qu'a menudo esta palatal pue llegar a perdese (GHLA 230-232).

El significante presenta la evolución regular de -au- > [o] y la palatalización de l- inicial llatina en [ʎ], solución característica del área centro-oriental asturiana, neto que de la zona A occidental (CanoAsturianisch 250). Si bien esta palatalización yá se produxera n'época prelliteraria, pa la representación gráfica de [ʎ] na tradición documental medieval asturiana tien abondao l'usu de <l-> (LapesaAvilés 84; OrdenancesUviéu 18). Precisamente, ye la grafía <l-> la que se manifiesta na documentación medieval citada infra. Pa una posible desplicación de [-o], véase GHLA 138-144, onde se discute la casuística de les vocales velares finales na variedá central o nuclear del asturianu. D'otramiente, nun ye casual que [-o] se manifieste nun bon númberu de topónimos de calter colectivu o abondancial, como'l mentáu Llorío, pues estos nomes de llugar avecen a facer alusión a terrenos poblaos por un conxuntu d'árboles (como'l lloréu) onde sobresal el rasgu continuu o non cuntable, lo que desixe n'asturianu concordancies axetives en [-o] como espresión del valir de la continuidá (GHLA 141-142).

La motivación del topónimu ha tar venceyada cola significación fitonímica que se-y atribúi al lexema de base. Asina, ye posible que'l llugar designáu como Llorío fuere n'orixe un sitiu abondante en lloros o lloreos o, a lo menos, propiciu –por una mayor humedá, por una ausencia de temperatures estremes, pola presencia d'espacios avesíos etc.– pal so espoxigue.