É sorprendente que o apelido Aldao presente unha terminación discordante coa do topónimo (Aldán), e non correspondente co resultado nesta zona da terminación latina -anu (>-án no occidente e -ao no resto do territorio) nin co étimo suposto do topónimo (-ane> -án); quizais algún portador nobre do apelido quixo indicar un aspecto arcaizante para dar idea da antigüidade da liñaxe. . Os portadores do apelido están maioritariamente concentrados en dúas zonas: unha coruñesa, nas comarcas da Coruña e Bergantiños, sobre todo na Laracha e en Arteixo; e outra pontevedresa, nas comarcas do Morrazo e Pontevedra, con maior densidade en Marín. Probablemente, os coruñeses, igual ca os pontevedreses, teñen como orixe remota o Aldán cangués (DAG).