Existiron outras explicacións deste topónimo: J. Pokorny propoñía que tal vez fose un composto dun derivado verbal da raíz *prāi- ‘estar contento con algo’, ‘amar’, co nome celta e xermánico do ‘cabalo’: Praesta-marci; serían os ‘amantes de los caballos’, coma o gr. Phil-ippos. Pero, como afirma BascuasHidron_2006, "Aunque fonética y morfológicamente posible, suele desecharse esta opinión, a pesar de la gran autoridad de Pokorny. A la verdad, no parece razonable cerrar los ojos a la obvia relación con el paralelo Super-tamarci y con el río Tamaris" (p. 25).

Corominas_1971 analiza as dúas formas como Super-tamar-ci e Praes-tamar-ci; con respecto ós prefixos, como o s- de super non é etimolóxica, senón que é exclusiva das linguas itálicas, fronte ó ide. *úper, pensa que a forma autóctona sería *Upertamarici, e o S- explícase por latinizacion, da mesma forma que o orixinal *Prestamarci se latinizaría en Praestamarci por confusión do prefixo *pres- co lat. prae 'diante'. En canto ó significado, considera que *Uper-tamar-ci deberon de ser as «xentes da parte baixa do río» e os *Pres-tamar-ci, as «xentes da parte alta do Tamaris». Pero este signficado desménteo a situación dos prestamarici ó sur da desembocadura do Tambre na península do Barbanza.

Untermann_1992 interpreta praes 'diante' e super 'por riba de'. Admite que super pode ser unha latinización, pero praes ten "correspondencia etimológica exacta del lat y osco-umbro prai ‘delante’ al que se ha añadido una s, tal vez el sufijo del comparativo -is-, tal vez un aumento debido a segmentaciones erróneas, tal como aparece en latín abs al lado de ab" (p. 372). Tamén considera que os dous prefixos son celtas, posto que el discrepa da crenza de que a perda de p- non é celta.

Bascuas concorda coa opinión de Untermann: "Si no tuviéramos más que Super-tamarci, podría pensarse en un compuesto simplemente latino, pero esto no es posible para Praes-tamarci". O p-, que non se conserva en celta, remóntase, segundo este autor, ó estrato paleoeuropeo; estes prefixos puideron entrar na lingua celta como préstamos.