Avania é un dos derivados da raíz indoeuropea aw(e)-  ‘humedecer, mollar, fluír’, unha das principais raíces hidronímicas establecidas por Pokorny, no seu grao pleno *av-, onde a semivogal se realiza como consoante por ir ante vogal: av-. Esta sería a formación radical máis simple e dela descenden tamén o hidrónimo galego Avia, o portugués Ave e, con diferentes sufixos, Avión e Aviño. A sufixación (-n- + -ĭa) aparece noutros hidrónimos prerromanos como Barbaña, Barraña, Bendaña, Moraña, etc. Deixou descendentes no galego A Baña e no leonés La Baña.