De etimo descoñecido.

As atestacións históricas con -aa- e a pronuncia trisilábica da que aínda hai vestixios orais parecen indicar a caída dunha consoantes intervocálica, posiblemente -L- (cf. Maariz < MALARICI, Caamaño < CALAMANIO). Por tanto, pese ao parecido, parece que hai que rexeitar unha orixe compartida co leonés Omañón, da familia do nome do río Omañas (afluente do Luna, en León) que, segundo Bascuas, está formado polo tema hidronímico *Um-, a través de Umana co sufixo -ia, común na hidronimia (BascuasHidron_2002: 232).

Existiu un nome latino Malanius (Schulze_1966). A partir del, podería pensarse nun cambio de declinación, por influencia dos antrotopónimos xermánicos, en *Malanio; do seu xenitivo, adaptado á segunda declinación, *MALANIONI, ou do acusativo, *MALANIONE, podería proceder o topónimo actual. Pero non encontramos rastros dese nome na documentación medieval.