El topónimu estudiáu ta formáu a partir del nome del primer posesor Uemenus (SantosInscripciones 227) que s'apón, en xenitivu, a un sustantivu de la mena de uīlla s.f. 'casa de campu, casería' (OLD), p'amosar la noción de 'posesión'. Son construcciones del tipu *uilla uemenis, esto ye, “villa de Vemeno”. Col pasu del tiempu, nestes estructures de determináu + determinante y, mesmo que lo qu'asocede n'otros ámbitos de la llingua, produzse l'aféresis del nucleu del sintagma. Queda entós nun bon númberu de casos namái que'l términu axacente pa nomar la propiedá. El xenitivu ha ser analóxicu col de los nomes de la tercer declinación, esto ye, en -is, lo que sí xustifica la solución moderna Bimenes (GarcíaToponAst 502; ConcepciónToponimia). Ye esti un procedimientu con percorríu na toponimia asturiana, y ye que tamién puen desplicase, dende xenitivos analóxicos en -is, otros topónimos con motivación antroponímica, como: Cienes (de Cenius), Tuenes (de Tudanius), etc. (GarcíaToponAst 502).

El significante presenta una evolución regular dafechu, con zarramientu de la vocal átona inicial. Ha tenese en cuenta que, en Bimenes, la realización oral del topónimu suel amosar una inflexón total del vocalismu átonu final: [βimeˈnes] > [βimeˈnis]. Esto respuende a la tendencia, bien constatada nel llugar, a la palatalización de [-a] final con dos niveles de zarramientu (a > e > i) (GHLA 22). D'esta manera, ye frecuente que los plurales femeninos nominales ofrezan una espresión del tipu casis (< cases), vaquis (< vaques), etc. Nel topónimu, la terminación en -es reinterprétase, por ultracorrección, como un femenín plural, lo que lleva a la inflexón posterior en -is.