É un derivado que parece portar o sufixo colectivo -ame (< lat. -AMĬNE, presente en cordame, dentame, ourizame, pelame). Con todo, como nas atestacións históricas alterna desde o séc. XII a terminación -ame con -amia, Bascuas 2014 cre que presenta o sufixo superlativo  -ĭmo- (coma no lat. optimus), + -ia, sufixo bastante frecuente en formacións prerromanas: Lausamia > *Lausamie > Lausame > Lousame. O seu significado sería o mesmo: 'lugar con moitas lousas' e a formación sería paralela a dun topónimo próximo,Berrimes: *Vernimias > *Verrimias > *Verrimies > Verrimes. Dadas as atestacións medievais, quizais confluíron os dous tipos de formacións.