Tense posto en relación co vasco iri 'cidade', pero esta hipótese debe desbotarse porque esta forma é o resultado medieval do antigo ibérico ili- ou -ilti 'cidade', mentres que a forma Iria se atesta como tal desde o séc. II.

Para BascuasHidron_2002:141-142 pode interpretarse como un dos derivados preceltas da raíz hidronímica *er- 'moverse', o que vén apoiado pola existencia doutros ríos Iria/Ira na Liguria, cunha alternancia comparable á de Nava/Navia, Lima/Limia, etc. Así, non sería unha formación illada, senón probablemente relacionada con Irias , na beira do río Miera (Santander), os ríos Irián (León) e Iro (Cádiz) e o topónimo galego Ribadil, segmentable como *Ripa de Iri > *Riba d'Iri > Ribadil.

Por estar moi ligado á historia xacobea, o topónimo foi obxecto de interpretacións etimolóxicas desde moi cedo. No séc. XI, asociouse con Ilion (o nome grego de Troia) e unha ficticia princisa Ilia, filla dun ficticio rei Troiano, a cal escapou da destrución de Troia co seu marido Teucro. Esta idea, procedente do Cronicón Iriense, transmitiuse na Crónica de Iria (séc. XV) e foi reproducida en varias ocasións posteriormente, como explica MoralejoÁlvarez_CallaicaNomina: 67-71.