A localidade actual estaba incluída no Couto das Achas, do mosteiro da Franqueira. Este vendeullo en 1568 a García Sarmiento de Soutomaior, conde de Salvaterra. Segundo Ávila y la Cueva (1852), as noticias máis antigas desta poboación son do ano 1583, nunha escritura do mosterio da Franqueira. Tamén se rexistra en plural (1663) como parte da parroquia de Valeixe, o que indica "que empezó por unas casetas o chozas hectas de ramas de árboles entretegidas y cubertas de paja", ou ben para nomear "los orrios en que los labradores recogen el maiz en espiga formados de bergas entretegidas" (HistoriaTui, pp. 283-284).

A parroquia fundouse en 1790, anexa á de Valeixe, ata que finalmente se desmembrou dela en 1815 como parroquia independente. No séc. XIX trasladouse alí a audiencia das Achas e erixiuse como cabeza e capital da súa xurisdición e partido, adquirindo a denominación da vila.

Nos textos posteriores ó séc. XV aparece co artigo castelanizado, pero coa forma Caniza conservada. Na documentación oficial consolidouse a partir da creación dos concellos, no séc. XIX, a forma castelanizada La Cañiza, que incluso se incorporou ao NG como A Cañiza, en 1984. Actualmente, dado que se comprobou o mantemento da forma orixinal, A Caniza, entre os seus habitantes, a Comisión de Toponimia propuxo a súa restauración como forma oficial.