O actual municipio está constituído polos antigos coutos de Astariz e Prado do Miño e polas xurisdiccións de Vide de Miño, Macendo e parte da de Ponte Castrelo do Miño, en concreto dúas parroquias atestadas no Antigo Réxime como Castrelo ou coa forma  castelanizada Puente Castrelo e que só se distinguían polas advocacións de Santa María (a que corresponde hoxe a Castrelo de Miño) e Santo Estevo (Ponte Castrelo). A actual parroquia de Barral é de creación recente e non figura nos nomenclátores ata o de 1960.

No século XVIII, no dicionario de Madoz, o concello e as dúas parroquias mencionadas figuran co nome de Castrelo de Miño, polo que os nomes destas debían alternar entre Castrelo de Miño e Ponte Castrelo. Sobre a ponte que lle deu nome á xurisdición e á actual parroquia de Ponte Castrelo, dise no dicionario de Madoz que foi construída na época de Pedro González Telmo (bispo de Tui no séc. XIII), "que vivió en sus inmediaciones",que constaba de oito arcos e que a destruíu unha nogueira que quedou atascada nun dos seus arcos durante unha enchente [DicMadoz, s.v. Castrelo de Miño (Sta. María)].