Cognatos e nomes de lugares relacionados

En Galicia hai outros 60 lugares chamados (O) Reboredo, sete (A) Reboreda, o plural Os Reboredos (un nas Pontes de García Rodríguez, Co) e o composto Torreboredo (A Estrada, Po). Atopamos algúns derivados como Rebordelo (en 16 lugares e na parroquia de Cotobade, en Pontevedra), Rebordelos (Val do Dubra, Santa Comba, Ordes e Carballo, na provincia da Coruña, e O Páramo, en Lugo) e Os Rebordelos (Muras, Lu). Este último tamén se rexistra co sufixo diminutivo moderno, Rebordiños (Vilalba, Esgos, e dous en Guitiriz, todos eles na Terra Chá luguesa) e en composición: Rebordondo (Cualedro, Ou, Portomarín e Taboada, Lu), Rebordochao (Monfero, Co) e Rebordondiego (O Saviñao, Lu); algúns levan un sufixo xentilicio: Rebordáns (Ponteceso, Negreira, Co), Rebordaos (tres na Coruña e tres en Lugo).