Segundo Delgado Gómez (2006), o nome do actual concello de Taboada está relacionado co de Ponte Taboada (concello de Santiso), que procede dunha ponte de táboas construída sobre o río Deza no ano 912, como consta aínda hoxe nunha inscrición nunha pena a carón da ponte; unía as terras limítrofes dos actuais concellos de Silleda e Lalín. Outra inscrición do mesmo ano testemuña a construción doutra ponte sobre o río Arnego na actual parroquia de Cadrón (Lalín), que continuaba o mesmo camiño real. Na documentación medieval consta xa unha terra de Taboada no séc. XIII. A liñaxe dos Taboada foi iniciada por Arias Pérez de Taboada, no mesmo século, e as súas posesións incluían a dita Ponte Taboada. Era orixinario da parroquia Sancte Marie de Tabulata, hoxe Taboada dos Freires (Santa María). O emblema heráldico desta casa nobre (condado outorgado en 1683, GEG) contén catro táboas verticais, en referencia á primitiva ponte de táboas. O actual concello contenas tamén no seu escudo.

O concello constituíuse en 1840, coa denominación da xurisdición da zona. Actualmente, ademais do concello, levan o nome a parroquia Taboada dos Freires (en referencia aos templarios, segundo Delgado Gómez 2006: 107-109), un lugar desta parroquia e outro da de Carballo (San Tomé) (NG).